- डॉ. सुधीर रा. देवरे
लोक आजारी आहेत
लोक भयंकर आजारी आहेत
लोक व्हॉट्सअप वाचतात
आणि आजारी पडतात
लोक फेसबूक- व्टिटर वाचतात
आणि आजारी पडतात...
लोक आजारी पडतात
आणि सोशल मीडियावर चिरकतात
लोक आजारी पडतात
आणि कचरा फॉरवर्ड करतात
लोक आजारी पडतात
आणि खांद्यांवर झेंडा घेतात
लोक आजारी पडतात
आणि अंगाची रंगातून ओळख देतात...
लोक चित्रपट पाहतात
आणि आजारी पडतात
लोक नाटक पहातात
आणि आजारी पडतात
लोक बंबाळतेने चर्चाळतात
आणि आजारी पडतात
लोक प्रायोजित टिव्ही पाहतात
आणि आजारी पडतात
लोक ‘पिसाळ’ भाषणं ऐकतात
आणि आजारी पडतात
लोक स्वस्त ‘मुखपत्र’ वाचतात
आणि आजारी पडतात...
शिळ्या कढीला उत आणत
लोक बुजलेली मढी उकरतात
इतिहासाला टांग मारत
मनगढत कहाण्या रचतात
लोक काल्पनिक सीमा आखून
फाळणीवर बार खेळतात
आणि आजारी पडतात लोक...
लोक खाचखळग्यांच्या रस्त्यांतून मुरगळत
आभाळपल्याड स्वर्ग भोगण्याच्या स्वप्नात
लोक मंदिरात.. दानपेट्या फुगवतात..
‘नंदी’च्या शेपटीला ‘देव’ करून सोडतात
दर्शनाला रांगा.. टाळ्या वाजवत..
आरत्या आणि भजनं भसाडं गाऊन
बदल्यात दैनिक ‘इरीद’ मिळवतात...
जान नसलेले अजान भोंगेही
गावागावात कान ठणकवतात
सत्य.. नारायण नागबलीत चप्पी
धूप धुपारे चेटवतात
न पिणार्‍याला ‘पाजत’.. दुधाच्या
अंघोळी घालत चिखलतात
फक्त ‘माणसा’साठी भेसळयुक्त
आणि यज्ञात अस्सल तूप जाळतात
‘निष्काम’ भक्तीत आजारी पडत
लोक डाराडूर झोपतात घरात...
‘पुजार्‍या’ला पक्कं माहीत असतं
देवळात देव नाही
पण ‘अडत्या’ला इलाज नाही
आणि धंद्याशिवाय
खुर्चीची उब नाही
म्हणून ‘पोथ्यां’मधून
नवे ‘देव’ जन्माला येत राहतात
आणि लोक आजारी पडतात…
निवडणुका जाहीर होतात
आणि लोक आजारी पडतात
लोक ‘वाचत’ नाहीत यथार्थ
फक्त ‘पाहून’च ‘मस्त’ होतात
आणि पटकन आजारी पडतात...
यांचे पोटापाण्याचे प्रश्न
चुटकीसरशी सुटत राहतात
यांच्या सगळ्या ‘मजा’ प्रायोजित असतात!
कोणत्याही विवंचनेशिवाय
इतके लोक प्रायोजित कसे?
आणि नसतील प्रायोजित तर
उत आलेले आजारीच असू शकतात...
आजारी लोक ‘राजरोज’ संचारतात
आणि सर्वदूर संसर्ग पसरवतात
या लोकांची घृणा करता येत नाही
कारण ते भयंकर आजारी आहेत
दिवसेंदिवस ही लागण फैलावणारी
या आजाराला डॉक्टर चालत नाही
आणि लोक पटापट आजारी होत जातात...
- पर्वतांवर विराजमान निर्जीव दगडं
लोकांना दूरुनही ओळखत नाहीत
पण दगडांच्या एकतर्फी भक्तीत
लोक आजारी पडत आहेत!
(अप्रकाशित. कवितेचा इतरत्र वापर करताना लेखकाच्या नावासह ब्लॉगचा संदर्भ द्यावा ही विनंती.)
© डॉ. सुधीर रा. देवरे
ब्लॉगचा पत्ता : http://sudhirdeore29.blogspot.com/
कोणत्याही टिप्पण्‍या नाहीत:
टिप्पणी पोस्ट करा